Xizək alpinizmi üzrə dünya çempionatının 2027-ci ildə Azərbaycanda keçirilməsi üçün müraciət edilib

Azərbaycan Qış İdman Növləri Federasiyası (AQİNF) xizək alpinizmi üzrə dünya çempionatına 2027-ci ildə ev sahibliyi etmək üçün beynəlxalq quruma müraciət edib.

Bu barədə "Report"a AQİNF-nin baş katibi Günel Bədəlova açıqlama verib.

O, Beynəlxalq Xizək Alpinizmi Federasiyasından (ISMF) müsbət cavab gözlədiklərini söyləyib:

"Cavabın bizim üçün müsbət olacağına ümid edirik".

G.Bədəlova Azərbaycanın 2026-cı ildə xizək alpinizmi üzrə Avropa çempionatı və Dünya Kubokuna ev sahibliyi edəcəyi ilə bağlı da fikirlərini bölüşüb:

"Avropa çempionatı daha əvvəl də planlaşdırılırdı. Turnir martın 4-8-i aralığında baş tutacaq. Əlavə olaraq Dünya Kuboku üçün müraciət etdik. Bu da müsbət qəbul olundu. Yarışlar eyni ayda gerçəkləşəcək. Startdan bir müddət öncə hazırlıqlara başlayacağıq".

Qeyd edək ki, Avropa çempionatının 2026-cı il martın 4-8-də, Dünya Kubokunun isə martın 6-8-də "Şahdağ" Turizm Mərkəzində keçirilməsi nəzərdə tutulub.