İngiltərə Premyer Liqası: “Liverpul” son dəqiqələrdə üç xalı əldən verib

İngiltərə Premyer Liqasının 37-ci turu çərçivəsində Birminhem təmsilçisi “Aston Villa” “Liverpul”u qəbul edib.

“QELEBE.AZ” xəbər verir ki, baş hakim Saymon Huperin idarə etdiyi oyun “Villa Park”da baş tutub.

Oyunda hesab erkən açılıb: artıq 2-ci dəqiqədə “qırmızılar”ın ingiltərəli yarımmüdafiəçi Harvi Eliotun ötürməsindən sonra topun müdafiəçiyə dəyməsi qapıçı Emiliano Martinesin topu əlindən qaçırtmasına səbəb olub, qol argentinalı qolkiperin adına yazılıb. Cəmi on dəqiqə sonra “aslanlar” Yuri Tilemansın dəqiq oyunu sayəsində status-kvonu bərpa ediblər. Bununla belə, Yürgen Kloppun yetirmələrinə hesabda yenidən irəli çıxmaq üçün 11 dəqiqə bəs edib: niderlandlı hücumçu Kodi Qakpo Premyer Liqada doqquzuncu qolunu vurub. İlk hissə qonaqların üstünlüyü ilə başa çatıb.

İkinci hissəyə də “Liverpul” erkən qolla başlayıb: 48-ci dəqiqədə 21 yaşlı müdafiəçi Carell Quansa Elliotun ötürməsini qolla tamamlayıb. İnamlı üstünlüyə baxmayaraq, Mersisayd təmsilçisi hesabı qoruya bilməyib. 85-ci dəqiqədə kolumbiyalı Con Duran birminhemlilərin ikinci qolunu vurub. Üç dəqiqə sonra isə adıçəkilən hücumçu Unay Emerinin komandasının çox vacib üçüncü qoluna imza atıb. Beləliklə, oyun heç-heçə başa çatıb.

Qeyd edək ki, 37 oyundan sonra “Aston Villa” 68 xalla dördüncü pillədə qərarlaşıb. Onun ən yaxın izləyicisi ehtiyatında bir oyun olan “Tottenhem”dir (63 xal). “Aslanlar” növbəti mövsüm üçün Çempionlar Liqasına vəsiqə qazanmağa yaxındırlar. “Liverpul” isə 37 oyundan sonra 79 xal toplayıb. “Qırmızılar” üçün “Aston Villa”ya qarşı oyun heç bir turnir əhəmiyyəti daşımayıb. Belə ki, komanda çempionluq yarışını dayandırsa da, üçüncü pillədəki yerini də sığortalayıb.

İngiltərə Premyer Liqası 38 həftədən ibarətdir. Hazırda turnir cədvəlinə 86 xalla “Arsenal” başçılıq edir. “Topçular”ın ən yaxın təqibçisi ondan bir oyun az keçirmiş “Mançester Siti”dir (85).

Xatırladaq ki, həm “Aston Villa”nın, həm də “Liverpul”un çalışdırıcıları mövsümün ən yaxşı baş məşqçisi adına namizəddirlər.