Çexiyalı futbolçu: "Mahir Emreli sürətli olsa da, Polşa liqasında iki qol vura bilib"

"Mahir Emreli sürətli oyunçu olsa da, liqada 15 matçda cəmi iki qol vura bilib".

"QELEBE.AZ" xəbər verir ki, bunu Polşanın "Legiya" klubunun futbolçusu Tomaş Pexart "Legia.net" saytına müsahibəsində deyib.

34 yaşlı çexiyalı hücumçu azərbaycanlı forvardın əsasən avrokuboklarda fərqləndiyini xatırladıb: "Amma orada fərqli oyun var. Çünki elə turnirlərdə hücumçunun daha çox yeri olur. Rəqiblər topu tez-tez saxlayır və əks-hücumlarda fərqlənmək, həmçinin, müdafiəçilərin arxasına ötürmə vermək şansı yaranır".

Qeyd edək ki, Azərbaycan millisinin hücumçusu Mahir Emreli 2021/2022 mövsümünün ilk yarısında Varşava təmsilçisində çıxış edib. 26 yaşlı futbolçu 33 qarşılaşmada 11 qola imza atıb. Hazırda müqavilə ilə Xorvatiyanın "Dinamo" (Zaqreb) klubuna məxsus olan Emreli icarə əsasında Türkiyə təmsilçisi "Konyaspor"un formasını geyinir.