Voleybol üzrə "Heydər Əliyev kuboku"na start verilib

Qadın və kişi voleybolçular arasında "Heydər Əliyev kuboku"na start verilib.

"QELEBE.AZ"un məlumatına görə, ümumilikdə 13 komandanın mübarizə apardığı yarışın ilk günü oyunlar iki arenada təşkil olunub və məğlub olan komandalar mübarizəni dayandırıblar.

Günün nəticələrinə görə, kişilərin mübarizəsində "Murov" və MOİK yarımfinala yüksəliblər. “Hərbi İnstitut” və “Express” komandaları müəyyən səbəblərdən son anda mübarizəyə qoşulmadıqlarına görə “Neftçi” və “Xarı bülbül Şuşa” klubları reqlamentə uyğun olaraq mübarizəyə birbaşa yarımfinaldan başlayacaqlar.

Qadınların yarışında isə "Abşeron", "Azərreyl" və UNEC növbəti mərhələyə adlayıblar. “Azərreyl-2” müəyyən səbəblərdən turnirdə iştirak etmədiyi üçün "Murov" klubu reqlamentə uyğun olaraq birbaşa yarımfinal mərhələsindən mübarizəyə qoşulacaq.

Oyunlardan sonra yarımfinal mərhələsinin püşkü atılıb. Aprelin 26-da və 27-də Voleybol Mərkəzində baş tutacaq yarımfinalda ilk gün qadınlar, növbəti gün isə kişilər finalçıları müəyyən edəcəklər.

Beləliklə, aprelin 26-da saat 14:00-da "Abşeron” - “Murov”, ardınca isə saat 16:00-da "Azərreyl" - UNEC qarşılaşmaları baş tutacaq.

Kişi voleybolçuların yarımfinal mərhələsində saat 16:00-da meydançaya “Xarı bülbül Şuşa” - “Neftçi”, iki saat sonra isə “Murov” və MOİK cütləri çıxacaqlar.

Oyunların nəticələri

Qadınlar

“Ryuga” - “Abşeron” 0:3

“Murov-2” - “Azərreyl” 0:3

“Xarı bülbül Şuşa” - UNEC 0:3

Kişilər

“Xarı bülbül-2 Şuşa” - “Murov” 0:3

“Təhsil” - MOİK 2:3

Yarımfinal

26 aprel

Qadınlar

14:00 “Abşeron” - “Murov”

16:00 “Azərreyl” - UNEC

Məkan: Voleybol Mərkəzi

27 aprel

Kişilər

16:00 “Xarı bülbül Şuşa” - “Neftçi”

18:00 “Murov” - MOİK

Qeyd edək ki, olimpiya sistemi ilə keçirilən yarış 4 gün davam edəcək. Oyunlar Voleybol Mərkəzində təşkil olunur.