Harri Keyn 2026-cı ilin “Qızıl top”un sahibi olub

“Bavariya” və İngiltərə millisinin hücumçusu Harri Keyn 2026-cı ilin “Qızıl top” mükafatını qazanıb.

Apasport.az xəbər verir ki, 33 yaşlı forvard karyerasında ilk dəfə “France Football” nəşrinin təsis etdiyi mükafata layiq görülüb.

Keyn ötən mövsüm “Bavariya” ilə Almaniya çempionluğu, ölkə kuboku və Superkubokunu qazanıb. O, Bundesliqada 36 qolla mövsümün bombardiri olub. İngiltərə millisi ilə dünya çempionatında isə üçüncü yeri tutub.

Bununla da Keyn “Qızıl top”u qazanan beşinci ingilis futbolçu olub. Ondan əvvəl Stenli Metyuz (1956), Bobbi Çarlton (1966), Kevin Kiqan (1978 və 1979) və Maykl Ouen (2001) bu mükafata sahib çıxıblar. Beləliklə, İngiltərə futbolçusu 25 illik fasilədən sonra yenidən bu mükafatı qazanıb.

Keyn, həmçinin 45 ildən sonra “Qızıl top”a layiq görülən ilk “Bavariya” futbolçusudur. Münhen klubunun sonuncu belə təmsilçisi 1981-ci ildə mükafatı qazanan Karl-Haynz Rummenigge olub. Daha əvvəl Gerd Müller (1970) və Frans Bekkenbauer (1972, 1976) də bu uğura imza atıblar.

Bundan başqa, Keyn 1996-cı ildən bəri “Qızıl top”u qazanan ilk Bundesliqa futbolçusudur. Həmin vaxt Dortmund “Borussiya”sının üzvü Mattias Zammer mükafatın sahibi olmuşdu.

Qeyd edək ki, 2022-ci ildən etibarən “Qızıl top” təqvim ili üzrə deyil, mövsümün nəticələrinə əsasən təqdim olunur.