Belçika millisinin sabiq futbolçusu narkotik qaçaqmalçılığında şübhəli bilinərək saxlanılıb
https://mail.qelebe.az//uploads/photo/belchika-millisinin-sabiq-futbolchusu-narkotik-qachaqmalchiliginda-shubheli-bilinerek-saxlanilib.webp
Belçika yığmasının sabiq futbolçusu Raca Nainqqolan narkotik qaçaqmalçılığında şübhəli bilinərək saxlanılıb.
"Report" "Gazet van Antwerpen"ə istinadən xəbər verir ki, yarımmüdafiəçi Cənubi Amerikadan Antverpen limanı vasitəsilə kokain qaçaqmalçılığında şübhəli bilinir.
Onun saxlanıldığı Belçika polisi tərəfindən təsdiqlənib. Polisdən verilən açıqlamada araşdırmaların Cənubi Amerikadan Antverpen limanı vasitəsilə Avropaya kokain idxalı və onun Belçikada yenidən paylanması ilə bağlı ehtimal olunan faktları əhatə etdiyi və 36 yaşlı futbolçunun tutulduğu bildirilib. Hazırda dinləmələrin davam etdiyi və təqsirsizlik prezumpsiyası prinsipinə uyğun olaraq, bu mərhələdə heç bir şərh verilməyəcəyi də əlavə olunub.
Qeyd edək ki, R.Nainqqolan "İnter" klubunun heyətində 2021-ci ildə İtaliya çempionu adını qazanıb. O, həmçinin İtaliyanın "Roma", "Kalyari", SPAL klublarında da forma geyinib. Futbolçunun son klubu Belçika təmsilçisi "Lokeren-Temse" olub.
