Naxçıvanda 15 və 16 yaşlı futbolçular üçün seleksiya məşqləri keçirilib

Naxçıvan Futbol Federasiyasının təşkilatçılığı ilə 15 və 16 yaşadək futbolçular üçün seleksiya məşqləri keçirilib.

Qurumdan "Report"a verilən məlumata görə, məşqlərdə Muxtar Respublikanın müxtəlif rayon və şəhərlərindən ümumilikdə 60-a yaxın yeniyetmə iştirak edib.

Onlar əvvəlcə məşqçilər tərəfindən verilən tapşırıqları icra edib, daha sonra ikitərəfli oyunlarda nəyə qadir olduqlarını göstərməyə çalışıblar. Muxtar respublikada, eləcə də “Araz-Naxçıvan”ın akademiyasında çalışan məşqçilər potensiallı və perspektivli futbolçuları müəyyən ediblər.

Seçilən yeniyetmələrdən ibarət komanda formalaşdırılacaq və onlar mütəmadi olaraq məşqlərə və oyunlara cəlb olunacaqlar. İnkişaf edən və fərqlənən futbolçular gələcəkdə “Araz-Naxçıvan”nın akademiyasına qəbul olunacaqlar.

Qeyd edək ki, bu seleksiya xarakterli məşqlər hər həftə təşkil olunacaq. Növbəti məşqdə qapıçılarla bağlı seçim ediləcək.