FIDE rusiyalı və belaruslu şahmatçıları beynəlxalq turnirlərə qaytarmaqdan imtina edib

Beynəlxalq Şahmat Federasiyasının (FIDE) Baş Assambleyası rusiyalı və belarusluları beynəlxalq turnirlərə qaytarmaqda imtina edib. Bununla belə, qurum 12 yaşadək uşaqların və sağlamlıq imkanları məhdud idmançıların beynəlxalq komanda yarışlarına buraxılması məsələsinə baxacaq.

“Report” xəbər verir ki, iclas Federasiyanın yutub kanalında canlı yayımlanıb.

FIDE-nin ali orqanı Rusiyanın Ukraynaya qarşı müharibəsi ilə əlaqədar beynəlxalq şahmat yarışlarında Rusiya və Belarusa qarşı sanksiyaların qüvvədə qalmasına səs verib. Həftəsonu Budapeştdə keçirilmiş Baş Assambleyanın iclasında nümayəndə heyətlərinin əksəriyyəti Rusiya və Belarus uşaq şahmatçılarına və həssas qruplara qoyulan bəzi məhdudiyyətlərin aradan qaldırılmasının mümkünlüyü ilə bağlı Beynəlxalq Olimpiya Komitəsi (BOK) ilə məsləhətləşmələr təklifini dəstəkləyib.

Bununla belə, Rusiya və Belarus milli komandalarına, rəsmi şəxslərə, habelə beynəlxalq yarışlarda rəsmi bayraq və himndən istifadəyə qarşı tətbiq edilən sanksiyalar qüvvədə qalacaq.

Sanksiya məsələsi haqqında yekun qərarı FIDE Şurası verəcək və onun səsvermənin nəticələrini ləğv etməyəcəyi gözlənilir.

Rusiya və Belarusdan sanksiyaların götürülməsi təklifi Qırğızıstan nümayəndə heyəti tərəfindən irəli sürülüb.

Azərbaycan daxil olmaqla FIDE-yə üzv olan 66 ölkə uşaqlara və həssas qruplara qoyulan məhdudiyyətlərin sonradan götürülməsi mümkünlüyü ilə sanksiyaların qüvvədə qalması qərarının lehinə, 41 ölkə isə bütün məhdudiyyətlərin tam saxlanılmasına səs verib. Cəmi 21 ölkə Rusiya və Belarusa tətbiq olunan bütün sanksiyaların ləğv edilməsindən yana olub. Postsovet məkanından bunun lehinə Rusiya və Belarusdan başqa, Ermənistan, Qırğızıstan və Türkmənistan səs verib. Rusiya və Belarusun beynəlxalq turnirlərə qaytarılmasının tərəfdarları arasında Serbiya, Yaxın Şərq, Mərkəzi və Cənubi Amerika, habelə Afrikanın bəzi dövlətləri var. Eyni zamanda, 11 ölkə bitərəf qalıb, 60-ı isə səsverməyə qatılmayıb.

BBC-nin nəql etdiyi kimi, uzun müddət gözlənilən səsvermə Qərbin Rusiyaya mədəniyyət, idman və diplomatiya sahələrində təzyiq göstərməyə davam etmək əzminin sınağı kimi qiymətləndirilirdi.

“Bu, Ukraynanın qələbəsidir”, – Ukrayna Şahmat Federasiyasından Viktor Kapustin BBC-yə söyləyib.

“Bu səsvermə o deməkdir ki, Rusiyanın güman etdiyi kimi yetərincə dəstəyi yoxdur”, – o əlavə edib.

“Rusiya təcavüzkar və işğalçıdır. Təcavüzkar idman da daxil olmaqla həyatının bütün sahələrində cəzalandırılmalıdır. Sanksiyaları qoruyub saxlamaq və ya hətta gücləndirmək vacibdir ki, onlar öz cinayətlərini etiraf etsinlər”, – o vurğulayıb.