Azərbaycan millisinin məşqçisi: Hələ ki, Fernandu Santuşla görüşmək imkanım olmayıb

Hazırda öz işimə davam edirəm. Hələ ki, Fernandu Santuşla görüşmək imkanım olmayıb.

Bunu “Report”a açıqlamasında Azərbaycan millisinin məşqçisi Arif Əsədov deyib.

53 yaşlı mütəxəssis hələ işinin başında olduğunu, lakin millinin yeni baş məşqçisi Fernandu Santuşla görüşmək imkanı tapmadığını bildirib: “Çünki onun səfəri çox qısa çəkdi. AFFA-dan bildiriblər ki, baş məşqçi iyulun əvvəlində gəldikdən sonra bütün məsələlərə aydınlıq gələcək. Hələ ki, fasilədir, klublarımız da istirahətdədir. Hazırlıq dönəmi başlayanda, yəqin ki, baş məşqçi də gəlib planlarını açıqlayacaq”.

Qeyd edək ki, AFFA rəhbərliyi Fernandu Santuş ilə "3+1" illik müqavilə bağlayıb. Onun qarşısına AVRO-2028-in seçmə mərhələsində uğurlu çıxış etmək məqsədi qoyulub.