Azərbaycan millisinin baş məşqçisi: Turnirdə uduzmaq o qədər də önəmli deyil

Turnirdə uduzmaq o qədər də önəmli deyil.

Bu sözləri "Report"a açıqlamasında Azərbaycanın minifutbol yığmasının baş məşqçisi Elşad Quliyev Monteneqroda təşkil olunan beynəlxalq turnirdə keçirdikləri iki oyunla bağlı danışarkən bildirib.

"Bizim üçün əsas məsələ təlim-məşq toplanışıdır. Fikrimiz odur ki, gətirdiyimiz futbolçuların hamısından maksimum istifadə edək. Kimin fiziki və ya taktiki durumunun hansı vəziyyətdə olması maraqlıdır. Rəqibləri məğlub etmək və ya onlara uduzmaq o qədər də önəmli deyil. Hələ futbolçuların tapşırıqlarımızı nə dərəcədə yerinə yetirə bildiyini görmək istəyirik. Avropa çempionatına qədər hələ bir ay vaxtımız var. Çalışacağıq ki, bu müddət ərzində, yoldaşlıq matçlarında çatışmayan cəhətlərimizin üzərində işləyək. Avropa çempionatına daha hazır vəziyyətdə getmək fikrimiz var. Rəqiblərin Rumıniya, Bosniya və Herseqovina, yaxud Monteneqro olmasının heç bir fərqi yoxdur. Komandamızın durumunu fikirləşirik. Hər futbolçuya şans veririk", - deyə mütəxəssis vurğulayıb.

E.Quliyev Avropa çempionatına qədər heyətdə dəyişiklik olub-olmayacağı ilə bağlı sualı cavablandırıb: "Toplanış bitəndən sonra oyunlara baxıb qərar verəcəyik".

Mütəxəssis qarşıdan gələn Monteneqro ilə oyun haqda danışıb: "Zəif rəqib yoxdur, Monteneqro inkişaf edən komandalardan biridir. Bizi yaxşı oyun gözləyir".

Qeyd edək ki, millimiz beynəlxalq turnirdə iki oyun keçirib. Əvvəlcə dünya çempionu Rumıniyaya 0:1 hesabı ilə məğlub olan komanda ikinci görüşdə Bosniya və Herseqovinanı üstələyib - 6:0. Yığma bu gün Monteneqro ilə münasibətləri aydınlaşdıracaq.