Emin Mahmudov: Əlimizdən gələni edəcəyik ki, Bolqarıstanla matçda qələbə qazanaq

Əlimizdən gələni edəcəyik ki, sabahkı matçda qələbə qazanaq.

"Report"un məlumatına görə, bunu milli komandanın kapitanı Emin Mahmudov "FIFA series - Edition 2024" layihəsi çərçivəsində keçiriləcək Azərbaycan - Bolqarıstan oyunundan öncə Tofiq Bəhramov adına Respublika stadionunda təşkil olunan mətbuat konfransında deyib.

E.Mahmudov matçla bağlı fikirlərini bölüşüb: "Öz oyunumuzu göstərib qələbə qazanmağa çalışacağıq. Bizi maraqlı bir görüş gözləyir".

Yarımmüdafiəçi baş məşqçi məsələsinə toxunub: "Mən milli komandada həm yerli, həm də xarici baş məşqçilərlə işləmişəm. Məşqçilər barədə nəsə demək istəmirəm. Hər biri ilə münasibətim yaxşıdır".

O, Azərbaycan millisinin Gürcüstan və Qazaxıstan yığmalarının cari mövsümdə etdiklərini təkrarlamaq ehtimalı ilə bağlı sualı cavablayıb: "Bir qədər çətin sualdır. Biz Qazaxıstan millisi ilə eyni qrupda idik. Səfərdə qalib gələ bilməsək də, qələbə qazanmaq üçün şanslarımız çox idi. Deyə bilmərəm ki, Qazaxıstan millisi bunu bəxt hesabına etdi. Biz də çalışacağıq ki, yaxın gələcəkdə bunu təkrarlayaq".

Qeyd edək ki, Azərbaycan millisi "FIFA series – Edition 2024" turnirində martın 25-də isə Bolqarıstan ilə qarşılaşacaq. Görüş saat 20:00-da Tofiq Bəhramov adına Respublika stadionunda keçiriləcək.