"Qarabağ FK – 30 mövsüm səfərdə" sənədli filminin təqdimatı olub

Bakıda "Qarabağ FK - 30 mövsüm səfərdə" sənədli filminin təqdimatı keçirilib.

"Report" xəbər verir ki, Heydər Əliyev Mərkəzində baş tutan və "Qarabağ" Futbol Klubundan (FK) bəhs edən filmin təqdimat mərasimində Prezidentin köməkçisi Anar Ələkbərov, mədəniyyət naziri Adil Kərimli, gənclər və idman naziri Fərid Qayıbov, Bakı Media Mərkəzinin rəhbəri Arzu Əliyeva, ölkənin idman və mədəniyyət nümayəndələri iştirak ediblər.

Filmdə "Qarabağ" Futbol Klubun keçdiyi tarixi dövrdən bəhs olunub, klubun SSRİ dövründəki uğurları izləyicilərin diqqətinə çatdırılıb.

Həmçinin, filmdə xarici jurnalistlərin və futbolçuların İmarət Stadionu, "Qarabağ" FK ilə bağlı hazırladığı materiallar və fikirləri də yer alıb.

Filmdə Ermənistan silahlı birləşmələri tərəfindən işğal edildikdən sonra Ağdam rayonu ərazisindəki İmarət Stadionunun taleyindən, Azərbaycanın Milli Qəhrəmanı Allahverdi Bağırovun klubdakı fəaliyyətindən də bəhs edilib.

Qeyd edək ki, Mədəniyyət Nazirliyi, "Salnaməfilm" və "Azərbaycanfilm"in ortaq layihəsi olan film 4 hissədən ibarətdir.