Tbilisidə medal qazanan "Sabah"ın baş məşqçisi: "Bu turnirlər böyük təcrübədir"

"Bu turnirlər bizim uşaqlar üçün böyük təcrübədir, daha çox şey öyrənmək baxımından şansdır".

Bunu "QELEBE.AZ"a açıqlamasında Gürcüstanda keçirilmiş “Tbilisi Cup”da ikinci yeri tutan "Sabah" klubunun 11 yaşadək futbolçulardan ibarət komandasının baş məşqçisi Arslan Quliyev deyib.

Mütəxəssis yarışda 9 kollektivin mübarizə apardığını bildirib: "Əvvəl 12 klubun iştirakı planlaşdırılsa da, bəzi səbəblərdən 3-ü qatılmadı. Komandalar üç qrupda yer almışdılar. Qrupda “Saburtalo”ya məğlub olduq (0:1), “Kolxeti-1913”ə qalib gəldik - 2:1. 1/4 finalda Gürcüstanın “TS Academy” klubunu qolsuz bitən matçın penaltilər seriyasında (5:4) üstələyərək yarımfinala vəsiqə qazandıq. Növbəti mərhələdə “Torpedo”ya (Gürcüstan) 1:0 hesabı ilə qalib gəldik. Tbilisinin “Lokomotiv” komandası ilə final görüşü heç-heçə (0:0) bitdi və penaltilər seriyasında uduzaraq (2:3) ikinci olduq.

Arslan Quliyev futbolçuların beynəlxalq turnirdə böyük təcrübə əldə etdiklərini vurğulayıb: "Bizim üçün bir az çətin idi. Öz çempionatımızda "6+1" formatında çıxış edirik. Orada isə "8+1" ilə mübarizə apardıq. Meydança da bir az böyük idi. Bizim futbolçular kiçik meydançalara öyrəşiblər. Getməmişdən əvvəl bu formatda bir neçə yoldaşlıq görüşü keçirdik. Amma rəqiblər bizdən təcrübəli idilər. Çünki onlar bir il yarım bu formatda futbol oynayırlar. Asan qələbə qazandığımız matç olmadı. Yaxşı və istedadlı oyunçular gördük. Bizim uşaqlar əzmkarlıq göstərdilər. İlk qarşılaşmada təcrübəsizlik bir az göründü. Bəziləri ilk dəfə idi ki, ölkədən kənara çıxırdı. İnanıram ki, bu səfər futbolçularıma böyük xeyir verəcək. Daim belə turnirlərdə iştirak etmək istəyirik".