“Sabah”ın idman direktoru: “Avrokuboklardakı çıxışımız Azərbaycan basketbolu üçün uğurlu oldu”

“Avrokuboklardakı çıxışımız Azərbaycan basketbolu üçün uğurlu oldu”.

Bunu “Report”a açıqlamasında “Sabah” basketbol klubunun idman direktoru Elşən Yusubov FIBA Avropa Kubokundakı çıxışlarına münasibət bildirərkən deyib.

Klub rəsmisi müntəzəm mövsümdə yer aldıqları qrupdakı çıxışlarını dəyərləndirib. O, güclü rəqiblərlə üz-üzə gəldiklərini etiraf edib: “Uzunmüddətli fasilədən sonra Azərbaycan klubu avrokuboklarda çıxış edirdi. Bu missiya ötən il yaranan “Sabah”ın üzərinə düşdü. Gənc komanda olmağımıza baxmayaraq, Avropa arenasındakı birinci mərhələni uğurla başa vurduq. 3 qələbə ilə növbəti raunda adladıq. Müntəzəm çempionatda güclü rəqiblərlə qarşılaşdıq. Xüsusən də Türkiyənin “Bağçaşəhər” və Çexiyanın “Nimburk” klubu çox güclü idilər. Sevindirici hal odur ki, bu komandalarla rəqabət apara bildik. Monteneqro “Mornar”ına səfərdə uduzsaq da, evdə qələbə qazanmağı bacardıq. Qrupun ən güclüsü “Bağçaşəhər” idi, sonda da birinci yeri tutdu”.

Elşən Yusubovun fikrincə, “Sabah”ın ilk mövsümündə təsnifat mərhələsini adlaması uğur sayılmalıdır: “Hesab edirəm ki, bu mərhələyə qədər gəlməyimiz uğur idi. “Nimburk”la səfər matçında böyük fərqlə uduzmuşduq. Ancaq evdəki görüşdə hətta qələbə qazanmaq imkanımız da yarandı. Nəzərə alaq ki, Artyoms Butyankovsun zədəsi var idi. Bunlar da onu göstərir ki, komandamız getdikcə təcrübəsini artırır və daha yaxşı çıxış edir. Topladığımız təcrübəyə əsasən və bundan sonra düzgün seçimlərlə nəticəni daha da yaxşılaşdırmaq olar”.

Qeyd edək ki, “Sabah” təsnifat mərhələsinin A qrupunda keçirdiyi hər üç oyunda qələbə qazanaraq birinci yeri tutub. Boban Mitevin komandası müntəzəm mövsümün D qrupunda isə 7 xalla üçüncü olub.