Azərbaycan millisinin sabiq kapitanı: “Bu Avstriyadan ən azı 1 xal almalı idik”

“Yığmamız bu Avstriyadan ən azı 1 xal almalı idi”.

Bunu “Report”a açıqlamasında Azərbaycan millisinin sabiq kapitanı Rahid Əmirquliyev AVRO-2024-ün seçmə mərhələsində Avstriya ilə keçirilən oyunla bağlı danışarkən deyib.

34 yaşlı futbolçu yığmanın Tofiq Bəhramov adına Respublika stadionunda 0:1 hesabı ilə məğlub olduğu görüşü zəif keçirmədiyini düşünür: “Avstriya ilə oyunu stadiondan canlı izləyirdim. Çətin olacağı bəlli idi. Ancaq evdə çıxış etdiyimiz üçün ən azı 1 xala ümid bəsləyirdik. Rəqibin heyətində ciddi itkilər var idi ki, bu da komandamıza fürsət yaratmışdı. Meydanı ən azı heç-heçə ilə tərk edə bilərdik. Əslində, yığmamız pis çıxış etmədi. Təəssüf ki, qol imkanlarından yararlanmaq mümkün olmadı”.

Yarımmüdafiəçinin fikrincə, millinin uğursuz nəticələri baş məşqçi ilə əlaqəlidir: “Millimizin çox yaxşı heyəti, yüksək keyfiyyətə malik futbolçuları var. Sadəcə, onları oynatmağı bacaran məşqçi lazımdır. Baş məşqçi amili böyük rol oynayır”.

Qeyd edək ki, Azərbaycan millisi yer aldığı F qrupunda sona iki tur qalmış 4 xalla 4-cü pillədə qərarlaşıb. Baş məşqçi Canni De Byazinin AFFA ilə müqaviləsinin müddəti isə noyabrın sonuna qədərdir.