Əfran İsmayılov: "Estoniya ilə matçda futbol oynamağı bacardığımızı göstərdik"

"Bu matçda göstərdik ki, futbol oynamağı bacarırıq".

Bunu "Report"a açıqlamasında Azərbaycan millisinin sabiq futbolçusu Əfran İsmayılov komandanın Tallində Estoniyaya 2:0 hesabı ilə qalib gəldiyi AVRO-2024-ün seçmə mərhələsinin oyunu barədə danışarkən deyib.

35 yaşlı keçmiş yarımmüdafiəçi yığmanın dünənki qarşılaşmada yaxşı çıxış etdiyini bildirib: "Rəqib də bizə uyğun idi və onlardan üstün oynadıq. Birinci hissədə istədiyimiz oyunu sərgilədik, hücuma daha çox çıxan tərəf olduq və qollar vurduq. İki top fərqi ilə irəlidə olanda isə bir az geri çəkildik. Meydan sahibləri də təzyiq göstərirdi, buna tab gətirərək layiqli qələbə qazandıq".

Onun fikrincə, milli bu cür oyunların davamını gətirə bilsə, daha yaxşı nəticələr əldə edə bilər: "Evdə Belçikaya 0:1 hesabı ilə uduzduğumuz matçda da yaxşı təsir bağışlamışdıq. Estoniyaya qarşı isə daha yaxşı oyun göstərdik. Seçmə mərhələdə çox xallar itirmişik. Yalnız gələcəyə ümid edə bilərik".

Hazırda "Araz-Naxçıvan"da məşqçi kimi fəaliyyət göstərən İsmayılov "bu seçmə mərhələdən sonra da Canni De Byaziyə şans verilməlidir" sualını da cavablandırıb: "Bir az çətin sualdır. Onu rəhbərlik daha yaxşı bilər. Məncə, kifayət qədər şans verilib və yeni nəfəs lazımdır. Yekun qərarı özləri verəcəklər. Amma Avstriyaya qarşı həmin oyunu göstərib qələbə qazansaq, De Byazi bizi dərindən fikirləşməyə məcbur edəcək".