Qurban Qurbanov “Linkoln”la keçiriləcək oyunu dəyərləndirib

“Neçə gün idi ki, püşkdə hansı komanda ilə düşəcəyimizi gözləyirdik.

APA xəbər verir ki, bu barədə “Qarabağ” futbol klubunun baş məşqçisi Qurban Qurbanov bildirib.

Qurbanovun sözlərinə görə, “Linkoln” Cəbəllütariq çempionudur və bəzən belə komandaların püşkdə çıxması insanlara və futbolçulara mane olur, rəqibi o qədər də ciddiyə almırlar.

“Amma bizim illərdir ki, Avropada təcrübəmiz var, illərdir bu cür komandalara qarşı oynayırıq. Elə ən çətin qarşılaşmalarımız da belə komandalara qarşı olur. Başda mən olmaqla, əsas da ilk turlarda diqqətli olmalıyıq”, - deyə baş məşqçi bildirib.

“Qarabağ”ın baş məşqçisi bildirib ki, rəqibə qarşı əvvəlki illərdəkindən daha ciddi yanaşmalıyıq.
“İllərdir bu işin içindəyik. Bu gün futbol tam dəyişib. Bütün ölkələr, komandalar futbol oynamağı bacarır. Üzərimizə böyük məsuliyyət düşür. İnşallah, çalışacağıq ki, ilk oyuna komandanı fiziki, taktiki və psixoloji cəhətdən tam hazır edək. Bugünkü məlumata görə, rəqib oyunlarını süni örtüklü meydanda keçirir. Bu da ola bilsin ki, bizə əlavə çətinlik yaratsın. Belə meydanlarla, belə oyunlarla daha əvvələr də üzləşmişik. İlk oyun səfərdə olduğu üçün həddindən artıq diqqətli yanaşacağıq. Çalışacağıq ki, azarkeşlərimizi sevindirək”, - deyə Qurban Qurbanov bildirib.