Zaqatalada "Sağlam məhəllə" idman zonası istifadəyə verilib

Bu gün Zaqatala rayonunda "Sağlam məhəllə” idman zonası istifadəyə verilib.

"Report"un Şimal-qərb bürosunun məlumatına görə, burada minifutbol və basketbol meydançaları, stolüstü tennis, şahmat, eləcə də hər yaş qrupuna uyğun fitnes avadanlıqları yerləşdirilib.

Tədbirdə gənclər və idman naziri Fərid Qayıbov, “Qarabağ” futbol klubunun baş məşqçisi Qurban Qurbanov, idman səfirləri - Aynur İmanova və Aliyə Paşayeva iştirak ediblər.

Açılış zamanı Zaqatala Rayon İcra Hakimiyyətinin başçısı Mübariz Əhmədzadə və rayon sakinləri çıxış edərək layihəyə görə Gənclər və İdman Nazirliyinə təşəkkür ediblər.

"Ocaq Sport" klubunun gimnastları, Zaqatalanın qızlardan ibarət futbol və basketbol komandalarının idmançıları uşaqlara master-klass keçib, müxtəlif idman hərəkətləri öyrədiblər.

"Sağlam məhəllə" layihəsini Gənclər və İdman Nazirliyinin dəstəyi ilə, əhalinin sağlam həyat tərzinin təmin edilməsi məqsədilə həyata keçirir.