Həsrət Cəfərov: “Zaqrebə çempion olmağa gəlmişdim”

“Zaqrebə çempion olmağa gəlmişdim, istəyimə də çatdım”.

Bunu “QELEBE.AZ”a açıqlamasında Azərbaycanın yunan-Roma güləşçisi Həsrət Cəfərov Xorvatiyanın paytaxtı Zaqrebdə keçirilən Avropa çempionatının qalibi olması ilə bağlı deyib.

67 kq çəki dərəcəsində bütün rəqiblərini üstələyərək, ilk dəfə qitə çempionu olan 21 yaşlı idmançı yarımfinal görüşündə 2022-ci ildəki məğlubiyyətin revanşını aldığını bildirib: “Ötən il Avropa çempionatında bürünc medal almışdım. Yarımfinalda türkiyəli Murat Fırata uduzmuşdum. Yenə yarımfinalda onunla üz-üzə gəldim və bu dəfə qələbə qazandım”.

H.Cəfərov komanda hesabında ikinci yeri tutmalarını da dəyərləndirib: “Qardaş ölkə Türkiyə yığmasından sonra komanda hesabında ikinci olduq. İnanıram ki, qarşıdan gələn dünya çempionatında komanda şəklində daha yaxşı nəticə göstərəcəyik. Bizi məsuliyyətli yarışlar gözləyir. Yaxşı hazırlaşmaq, həmin mötəbər turnirlərdə də qızıl medal qazanmaq lazımdır”.

Qeyd edək ki, yunan-Roma güləşi üzrə Azərbaycan millisinin heyətində Həsrət Cəfərov (67 kq) və Ülvü Qənizadə (72 kq) Xorvatiyada keçirilən Avropa çempionatının qalibi olublar, Eldəniz Əzizli (55 kq), Taleh Məmmədov (63 kq) və Sabah Şəriəti (130 kq) gümüş, Nihat Məmmədli (60 kq) isə bürünc medal qazanıblar.