Voleybol üzrə Azərbaycan Yüksək Liqalarının qalibləri mükafatlandırılıblar

Kişi və qadınlardan ibarət voleybol üzrə Azərbaycan Yüksək Liqalarının qalibləri mükafatlandırılıb.

"QELEBE.AZ" xəbər verir ki, mükafatlandırma mərasimində Azərbaycan Voleybol Federasiyasının (AVF) vitse-prezidentlər Faiq Qarayev və Bəhruz Quliyev, qurumun baş katibi Faiq Orucov, İdarə Heyətinin üzvləri Elqar Bağırov, İlqar Nuriyev və nəzarət təftiş komissiyasının sədri Nazim Axundov iştirak ediblər.

Əvvəlcə qadınların yarışında mükafat qazanan komandalar medallarını alıblar.

“Azərreyl” qızıl, "Abşeron" gümüş, "Murov" isə bürünc medala layiq görülüb.

Qadınların çempionu “Azərreyl”ə kuboku AVF-nin vitse-prezidenti Faiq Qarayev təqdim edib.

Daha sonra isə kişilərin yarışının medalçıları öz mükafatlarına qovuşublar.

"Murov" qızıl, “Xarı bülbül" gümüş, "Neftçi" isə bürünc medal alıb.

Çempion “Murov”a kuboku federasiyanın digər vitse-prezidenti Bəhruz Quliyev verib.

Mükafatlandırma mərasimində həmçinin oyunçular arasında bir neçə nominasiya üzrə ən yaxşılar təltif ediliblər.

Qadınlardan "Abşeron"un üzvü Valeri Kondratyev "ən yaxşı toppaylayıcı", "Azərreyl"dən Tatsiana Trafimova "ən yaxşı hücumçu", "Abşeron"dan Bəyaz Quliyeva "ən yaxşı libero" nominasiyasında qalib olub.

Kişilərdə isə "Murov"dan Vladislav Kunçebko "ən yaxşı hücumçu”, onun komanda yoldaşı Kənan Allahverdiyev "ən yaxşı libero", "Xarı bülbül"dən İlqar İmamquliyev "ən yaxşı toppaylayıcı", "Neftçi"dən Tural Həsənli isə "ən yaxşı oyunçu" nominasiyasında fərqləndirilib.