Eldar Kərimov: “Valideynlər məşqləri görmədən düşünürlər ki, reqbi təhlükəli idman növüdür”

“Valideynlərlə bağlı çətinlik çəkirik. Onlar məşqləri görmədən düşünürlər ki, reqbi təhlükəli, zədəyəmeyilli idman növüdür”.

Bu fikirləri “Report”a müsahibəsində “Qarabağ” reqbi klubunun təsisçisi Eldar Kərimov deyib.

Azərbaycan millisinin sabiq oyunçusu ölkədə bu idman növünə maraq göstərən kifayət qədər yeniyetmə olduğunu bildirib: “Reqbi unikal idman növüdür. Fiziki güc və iradə tələb edir. Bizim uşaqlar da güləşməyi, fiziki mübarizəni çox sevirlər. Eyni zamanda, komanda idman növüdür və topla oynanılır. Yəni, reqbidə bir çox idman növünün elementləri cəmləşib. Uşaqların 90 faizi gəlib 1-2 məşqdə iştirak etdikdən sonra bu idman növünü davam etdirir”.

O qeyd edib ki, reqbidə nadir hallarda ciddi zədə olur: “Böyük futbolla müqayisədə burada zədə sayı qat-qat azdır. Reqbidə ayaq təması yoxdur, burada əsas məqam güləş fəndi ilə oyunçunu saxlamaqdır. Əzilmələr ola bilər. Amma unutmayaq ki, uşaqlar əzilə-əzilə böyüyürlər. Klub 7 ildir fəaliyyət göstərir. Bu müddətdə cəmi bir uşağın qolu sınıb. Bu da reqbinin təsirindən olmamışdı. Çəkisi çox idi, qolunun üstünə yıxılmışdı”.

Eldar Kərimovun müsahibəsinin tam versiyasını buradan oxuya bilərsiniz.