Əfsanəvi basketbolçunun forması hərracda 2 milyon dollara satılıb

Əfsanəvi basketbolçu Maykl Cordanın 1992/1993 mövsümündə geyindiyi və üçüncü dəfə NBA çempionu olduğu forması 2 milyon 623 min dollara satılıb.

"QELEBE.AZ" ESPN-ə istinadən xəbər verir ki, forma "Heritage Auctions" hərrac evində öz sahibini tapıb.

Basketbolçu 1992-ci il noyabrın 6-dan 1993-cü il martın 24-nə qədər 17 oyunda forma geyinib. Daha sonra onun "Sports Illustrated" jurnalının üz qabığında bu forma ilə şəkli yerləşdirilib.

Maraqlıdır ki, həqiqətən də bu formanı M.Cordanın geyindiyini sübut etmək üçün mütəxəssislər sözügedən dövrlərdə 11 matçdan fotoları müqayisə etməklə araşdırma aparıblar. Digər altı oyundan olan fotoların bəzilərində formalar, bir qismində isə şortlar uyğun gəlib.

Qeyd edək ki, əfsanəvi basketbolçu ilə əlaqəli ən bahalı əşya hələ də 1998-ci ildə NBA finallarında geyindiyi fomadır. Bu geyim 2022-ci ilin sentyabrında 10 milyon dollara satılıb. Bu da həmin vaxt hərracda satılan ən bahalı idman əşyası olub.