Qurban Qurbanov: "Əsl kubok matçı idi"

“Bəlkə sönük oyun kimi görmək olardı. Amma əsl kubok matçı idi. Hər iki komanda qalib gəlmək istəyirdi”.

“Report”un məlumatına görə, bunu “Qarabağ”ın baş məşqçi Qurban Qurbanov “Qəbələ” ilə 2:2 hesablı heç-heçə etdikləri Azərbaycan Kubokunun 1/4 final oyunundan sonra mətbuat konfransında deyib.

50 yaşlı mütəxəssis rəqibin yaxşı çıxış etdiyini bildirib: “Qəbələ” qələbəyə layiq oynadı. Maraqlı oyun alındı. Qalib gələ bilərdik. Amma son dəqiqələrdə ehtiyatsızlıqdan qol buraxdıq. Qəbələdəki oyun buradakından da baxımlı alına bilər”.

O, eyni komandaya qarşı ardıcıl 3 oyun keçirməyin futbolçular üçün xoş hal olmadığını söyləyib: “Bəzi illərdə belə hallar olub. Buna məcburuq. Belə görüşlərdə diqqətli olmalısan. Hər oyunda əvvəlkindən daha istəkli olmalısan”.

Çalışdırıcı matça gəlməyən “İmarət” fan-klubunun yoxluğunu hiss etdiklərini sözlərinə əlavə edib: "Meydandakı oyun futbola bənzəmirdi. İlk dəqiqələrdən oyun ab-havası yox idi. Amma get-gedə hamı aktivləşdi. İstərdik ki, azarkeşlər həmişə stadionda olsunlar. Ümumiyyətlə, “Neftçi” ilə görüşdə baş verənlər ilk dəfədir olmur. Polis işçiləri ilə azarkeşlər arasında qarşıdurmalar olub. Yazılı olmasa da, şifahi şəkildə maraqlanmışıq. Azarkeşləri küsdürmək olmaz. Onlarsız futbol maraqlı olmur. Bizim azarkeşlərlə münasibətimiz həmişə yaxşı olub.

Düzdür, bizə aid olmayan məsələdir. Ancaq həmişə onların yanındayıq. Öz oyunumuzla, nəticələrimizlə azarkeşləri sevindirmək istəyirik”.

O, braziliyalı yarımmüdafiəçi Kadi Borqesin Polşa yığmasına dəvət olunub-olunmaması məsələsinə də münasibət bildirib: “Kadi ilə bağlı kluba rəsmi heç bir məlumat gəlməyib. Buna adi söz kimi baxıram. Rəsmi təklif gələrsə, ətraflı danışmaq olar”.

Baş məşqçi müdafiəçi Abbas Hüseynovun zədəsini tam sağaltdığını qeyd edib: “Abbas sabahdan kollektivlə tam şəkildə məşqlərə başlayacaq. Qarşıdakı oyunlarda tam sağlam olması gözlənilir”.

Qeyd edək ki, cavab görüşü dekabrın 19-da keçiriləcək.