Premyer Liqa: "Sabah" qələbə qazanaraq "Qarabağ"la xal fərqini azaldıb

Futbol üzrə Azərbaycan Premyer Liqasında XV turun daha bir oyunu keçirilib.

"Report"un məlumatına görə, günün ilk matçında "Turan Tovuz" "Sabah"ı qəbul edib.

Tovuz şəhər stadionundakı qarşılaşma qonaqların 1:0 hesablı qələbəsi ilə bitib. Yeganə qolu 80-ci dəqiqədə Aleksey Kaşuk vurub.

Xallarının sayını 38-ə çatdıran "Sabah" lider "Qarabağ"la xal fərqini üçə endirib. Tovuz təmsilçisi isə 16 xalla 6-cı sıradadır.

Qeyd edək ki, günün digər görüşündə "Sumqayıt" "Qəbələ" ilə üz-üzə gələcək. Turun əvvəlki matçlarında "Neftçi" "Səbail"i 3:1 hesabı ilə üstələyib, "Kəpəz" Şamaxıda eyniadlı komanda ilə heç-heçə edib - 1:1, "Qarabağ" isə "Zirə"nin müqavimətini qıra bilməyib - 0:0.