Taleh Nəsibov: "Azərbaycan çempionatında iştirak etmək istəyən komandalar çoxdur"

"Azərbaycan çempionatında iştirak etmək istəyən komandalar çoxdur".

"Report"un məlumatına görə, bunu jurnalistlərə açıqlamasında Azərbaycan Minifutbol Federasiyasının (AMF) prezidenti Taleh Nəsibov 2022/2023 mövsümünün püşkatma mərasimində deyib.

O, bəzi komandaların müəyyən kriteriyalara cavab vermədiyini bildirib: "Federasiya olaraq hər il olduğu kimi yenə daha da təkmilləşməyə doğru gedirik. Komandaları və oyunçuları daha da peşəkar etmək niyyətindəyik. Düşünürəm ki, gələn il çempionatın iştirakçıları daha da çox olacaq. Federasiyanın işlərində fərqli yanaşmalar görəcəyik. 2023-cü ildə birinci və ikinci liqaların da olmaq ehtimalı var".

Nəsibov yarışda ilk iki yeri tutanların UEFA Çempionlar Liqasında, üçüncü yerin sahibininin isə Avroliqada ölkəni təmsil edəcəyini xatırladıb: "Əvvəl belə hal yox idi. Bu, həm bizim reytinqimizə uyğundur, həm də komandalarımızın peşəkarlıq səviyyəsinin yüksək olması deməkdir. İstəyirik ki, Azərbaycan klublarından hansısa biri Çempionlar Liqasının kubokunu ölkəmizə gətirsin".

Bütün qarşılaşmaların eyni meydançada gerçəkləşəcəyini diqqətə çatdıran federasiya prezidenti bildirib ki, peşəkar futboldan uzaqlaşan şəxs bir il sonra AMF-in yarışına qatıla bilər.