Paris-2024-də çalışan azərbaycanlı: Bakı-2015 Avropa Oyunlarının təşkilatçılıq səviyyəsinə heç bir tədbir çatmayıb

“Bakı-2015 Avropa Oyunlarının təşkilatçılıq səviyyəsinə heç bir tədbir çatmayıb”.

Bunu “Report”un Parisə ezam olunmuş əməkdaşına açıqlamasında olimpiadanın boks yarışlarının keçirildiyi arenanın Media Əməliyyatlar Şöbəsində çalışan azərbaycanlı əməkdaş Səriyyə Məlikova deyib.

O, Paris-2024-də başqa azərbaycanlıların da çalışdığını bildirib: “Bu, ikinci olimpiadamdır, ilk dəfə Tokioda təşkil olunan yarışda çalışmışam. Parisə iyulun 24-də gəldim və “North Paris Arena”da Media Əməliyyatlar Şöbəsində işə başladım. İlk dəfə 2015-ci ildə Bakıda keçirilən Avropa Oyunlarında Media Əməliyyatları komandasında fəaliyyət göstərmişəm.

Daha sonra layihələrdə, idman tədbirlərində, festivallarda çalışdım. Hər dəfə ya sosial şəbəkələr vasitəsilə müraciət ünvanlayıram, ya da iş yoldaşlarım belə tədbirlərə dəvət edir. Vaxtım olduğu müddətdə dəvətləri qəbul edib işləyirəm. Media Əməliyyatları Şöbəsində əlavə olaraq iki azərbaycanlı var. Onlar fərqli arenalarda çalışırlar. Həmçinin nəqliyyat və təhlükəsizlik üzrə komandalarda çalışan azərbaycanlılar da var”.

S.Məlikova təşkilatçılıq səviyyəsinə görə Bakıda keçirilən Avropa Oyunlarını xüsusilə fərqləndirib: “Bakı-2015 Avropa Oyunlarının təşkilatçılıq tsəviyyəsinə heç bir tədbir çatmayıb. Həqiqətən də hər şey çox yüksək səviyyədə idi. Əcnəbi iş yoldaşlarım da ilk Avropa Oyunlarını xatırlayırlar və hər cəhətdən çox peşəkar hazırlıq görüldüyünü deyirlər. Həmçinin Bakıdakı İslam Həmrəyliyi Oyunları və Avropa Gənclər Olimpiya Festivalı da yüksək səviyyədə təşkil edilmişdi. Mən və bir çox iş yoldaşlarım Bakı-2015-in yetirmələriyik”.

O, olimpiadada fəaliyyət göstərən könüllülərin işinin öhdəsindən tam gələ bilmədiyi barədə deyilənlərə belə reaksiya verib: “Könüllülük spesifik mövzudur. Bu insanlar öz vaxtlarını ayırıb hansısa tədbirə töhvə vermək üçün gedirlər. Onları hazırlamağa çox vaxt olmur. Könüllülər, demək olar ki, bir təlimdən sonra gəlib komandaya qoşulurlar. Ona görə də onlarla səbrli davranmağı məsləhət görərdim. Onlar, sadəcə, təcrübə və gözəl xatirələr üçün bizə qoşulurlar".