Azərbaycanın 3x3 basketbol millisi Serbiya ilə oyun keçirib

3x3 basketbol idman növü üzrə Azərbaycan yığma komandası qarşıdakı Avropa Kubokuna hazırlıqlarını davam etdirir.

Azərbaycan Basketbol Federasiyasının mətbuat xidmətindən "Report"a verilən məlumata görə, 9-11 sentyabr tarixlərində Avstriyanın Qrats şəhərində baş tutacaq Avropa Kubokuna hazırlaşan kişilərdən ibarət 3x3 basketbol yığması avqustun 28-i Serbiyaya yola düşüb.

Təlim-məşq toplanışında iştirak edən Amil Həmzəyev, Zaur Paşayev və Endər Poladxanlıdan ibarət komanda Novi Sad şəhərində 3x3 Serbiya millisi və bir sıra yerli klublar ilə yoxlama oyunları keçirib. Türkiyənin Konya şəhərində keçirilmiş V İslam Həmrəyliyi Oyunlarının gümüş medalçısı olmuş Azərbaycan millisi Serbiyaya 17:21 hesabı ilə uduzub. Yığma komandanın Serbiyadakı təlim-məşq toplanışı 8 sentyabradək davam edəcək.

Qeyd edək ki, milli Avropa Kubokunun D qrupunda Niderland və Belçika komandaları ilə mübarizə aparacaq.