Azərbaycanlı jokeyin məşqçisi: Aqata 2 yaşından yəhərə minmək istəyirdi - MÜSAHİBƏ

Bir neçə gün öncə Fransanın Le Mans şəhərində atçılığın dresaj növü üzrə keçirilən CDİP kateqoriyalı beynəlxalq yarışın qalibi olan Azərbaycan millisinin üzvü Aqata Zəhrabəyovanın anası, eyni zamanda məşqçisi olan İrina Zəhrabəyova “QELEBE.AZ”a müsahibə verib.

O, qızının çıxışlarına toxunub, həmçinin qarşıdakı planlardan danışıb.

- Öncə Fransadakı uğurunuzla bağlı düşüncələrinizi öyrənmək istərdik?

- Bu, istənilən idmançı üçün böyük nəticədir. Çünki yarışda bu kateqoriya üzrə ən güclü idmançılar mübarizə aparırdılar. Göstərdiyi nəticə Aqataya dünya reytinqində 8-ci yerə yüksəlməyə imkan verdi.

- Aqata buna qədər Almaniyada təşkil olunan beynəlxalq yarışda üçüncü olmuşdu. Fransadakı nəticəyə onun ilk böyük uğuru demək olar?

- Aqata il boyunca yaxşı çxış edir, həmişə medallar qazanır. Ötən il Avropa çempionatının finalına yüksələ bilmişdi.

- Maraqlıdır, onu bu idman növünü seçməyə siz sövq etmisiniz?

- Özüm də vaxtilə bu idman növündə mükafatlar qazanmışam. Yəni bu, daha çox ailə ilə əlaqədardır (gülür). Aqata 2 yaşından yəhərə minmək istəyirdi və bu işdə ona dəstək oldum.

- Uzun müddətdir Azərbaycanda yaşayırsınız?

- Bəli, Aqatanın atası Azərbaycanda anadan olub. Ancaq hazırda biz məşqlərimizi Almaniyada davam etdiririk. Çünki bu idman növü üzrə ən mühüm yarışlar Almaniyada keçirilir. Aqata Azərbaycan pasportuna malikdir və ölkəni beynəlxalq arenalarda qürurla təmsil edir.

- Qarşıdakı planlarınız necədir? Hansı yarışlara hazırlaşırsınız?

- Növbəti həftə Almaniyanın Hagen şəhərində beynəlxalq yarış start götürəcək. Daha sonra iyulda Belçikada Avropa çempionatı keçiriləcək. Qızım hər iki yarışa qatılacaq.