Məşhur tennisçi karyerasını başa vurur

İsveçrəli məşhur tennisçi Roje Federer peşəkar karyerasını bitirəcəyini açıqlayıb.

"QELEBE.AZ"un məlumatına görə, bu barədə 41 yaşlı idmançı sosial şəbəkə hesabında paylaşım edib.

O bildirib ki, İngiltərənin paytaxtı Londonda keçiriləcək Leyver Kubokundan sonra tennislə vidalaşacaq. Federer səhhətinin ona əvvəlki səviyyədə çıxış etməyə imkan vermədiyini söyləyib.

Qeyd edək ki, Roje Federer karyerası ərzində 103 titul qazanıb. O, səkkiz dəfə Uimbldon turnirinin, altı dəfə Avstraliya Açıq turnirinin, beş dəfə ABŞ Açıq çempionatının və bir dəfə "Rolan Qarros"un qalibi olub.