"Xəzri"nin baş məşqçisi: Həm hücumda, həm də müdafiədə aqressiv oyun sərgilədik

Həm hücumda, həm də müdafiədə aqressiv oyun sərgilədik.

"Report" xəbər verir ki, bunu "Xəzri"nin baş məşqçisi Murat Dikmen Azərbaycan Basketbol Liqasının pley-off mərhələsində “Sərhədçi” ilə görüş barədə klubun mətbuat xidmətinə açıqlamasında bildirib.

"Matç ilk dəqiqələrdən etibarən nəzarətimiz altında keçdi. Həm hücumda, həm də müdafiədə aqressiv oyun sərgilədik. Rəqibin hansı planla çıxış edəcəyinin fərqində idik. Ona uyğun olaraq da xüsusi müdafiə sistemi qurmuşduq. Böyük fasiləyə də istədiyimiz kimi yollanmağı bacardıq. Eyni zamanda, rəqibin geridönüş etməsinə imkan vermədik. Pley-off mərhələsi olduğu üçün həm müdafiə sərtliyi, həm də hücumdakı fərqli seçimlərin olması bizim üçün çox vacib idi. Bu görüşdə də istədiklərimizi həyata keçirməyi bacardıq", - deyə türkiyəli mütəxəssis söyləyib.

O, heyətdəki basketbolçuların durumu ilə bağlı da danışıb: "Amil Həmzəyevin zədədən sonra istədiyimiz performansı göstərməsi Ceremi Maklaflinin də rahat oynamağına şərait yaratdı. Digər basketbolçularımız da üzərlərinə düşəni artıqlaması ilə yerinə yetirdilər. Platek təxminən bir aydır zədəli idi və bu gün ilk matçına çıxdı. Endryunun meydanda olması rəqib müdafiəçilərin daha diqqətli olması ilə nəticələnir və bunun sayəsində digər oyunçularımız daha uyğun mövqelərdən atışlar edirlər. Gün keçdikcə onun 3 xallıq atışlarını bərpa edəcəyinə və daha yaxşı performans sərgiləyəcəyinə ümid edirəm. Əlavə olaraq Səid İsmayılov da müdafiədə önəmli işlər gördü".

M.Dikmen komandasının bu qarşılaşamada çox yaxşı mübarizə apardığını deyib: "Xüsusi bir səbəbə görə Yusuf Muhammed bu görüşdə heyətdə yer almamışdı. Pley-offda bütün oyunçularıma ehtiyacım var. İstədiyimiz performansı yenidən göstərməyə başlamışıq. Bundan sonra ümid edirəm ki, həm mental, həm də fiziki vəziyyətimizi istədiyimiz səviyyəyə yüksəldərik".

Qeyd edək ki, ötən gün "Sərhədçi" İdman Mərkəzində baş tutan "Xəzri" - "Sərhədçi" matçı birincilərin 98:64 hesablı qələbəsi ilə yekunlaşıb. Komandalar arasında 1/4 final mərhələsinin ikinci oyunu mayın 3-də baş tutacaq.