Azərbaycan millisinin müdafiəçisi: Fərqli futbol mədəniyyətinə sahib komandalarla qarşılaşacağıq

Fərqli futbol mədəniyyətinə sahib komandalarla qarşılaşacağıq.

"Report"un məlumatına görə, bunu milli komandanın və "Qarabağ"ın müdafiəçisi Bəhlul Mustafazadə "FIFA Series - Edition 2024" layihəsi çərçivəsində keçiriləcək Azərbaycan - Monqolustan oyunundan öncə Tofiq Bəhramov adına Respublika stadionunda təşkil olunan mətbuat konfransında deyib.

O, meydana yüksək əhval-ruhiyyədə çıxacaqlarını bildirib: "Milli komandada ab-hava yüksək səviyyədədir. Hər şey qaydasında davam edir. Yorğunluğa baxmayaraq, yığmada ikiqat məsuliyyətlə çalışacağıq".

B.Mustafazadə UEFA Avropa Liqasının 1/8 finalda Almaniyanın "Bayer 04" klubu ilə keçirdikləri oyunlara (2:2, 2:3) da toxunub: "Bütün Azərbaycan xalqı "Bayer 04"ə qarşı mübarizəmizdən məmnun qalıb. 100 milyon qiyməti olan futbolçu topu qapıya vura bilmirsə, mənim də qol vura bilməməyim mənə təsir etmir".

Qeyd edək ki, Azərbaycan millisi "FIFA series – Edition 2024" turnirində martın 22-də Monqolustan, 25-də isə Bolqarıstan ilə qarşılaşacaq. Hər iki görüş saat 20:00-da Tofiq Bəhramov adına Respublika stadionunda keçiriləcək.