Azərbaycan stolüstü tennisçiləri Ankarada beynəlxalq toplanışa qatılıblar

Azərbaycan stolüstü tennisçiləri növbəti beynəlxalq təlim-məşq toplanışına qatılıblar.

Federasiyanın mətbuat xidmətindən "Report"a verilən məlumata görə, milli komandanın üzvləri bu məqsədlə Türkiyənin paytaxtı Ankaraya yollanıblar.

Baş məşqçi Fərhad İsmayılovun rəhbərliyi altında Vəzir Allahverdiyev, Nihat Məmmədov, Adil Əhmədzadə, Rüstəm Hacılı, Hüseyn Eylazov, Zemfira Mikayılova, Ləman Abdulhəmidova, Xədicə Əbilzadə, Arzu Aslanova, Mərziyyə Nurmətova, Yağmur Məmmədli və Aylin Əsgərova bu gündən aprelin 1-dək toplanışda olacaqlar. Hazırlıq prosesi Türkiyə millisi ilə birgə keçiriləcək.

Qeyd edək ki, daha bir stolüstü tennisçimiz Onur Quluzadə hazırda Çində təlim-məşq toplanışındadır.