AFFA-nın texniki direktoru: “Braqa” "Qarabağ"a münasib rəqibdir”

“Braqa” “Qarabağ”a münasib rəqibdir”.

Bunu “QELEBE.AZ”a açıqlamasında “Qarabağ”ın sabiq futbolçusu Cahangir Həsənzadə Ağdam klubunun UEFA Avropa Liqasının pley-off mərhələsində Portuqaliya klubu “Braqa” önündə şansları barədə danışarkən deyib.

AFFA-nın texniki direktorunun fikrincə, rəqibin müdafiə xəttində boşluqlar var: “Braqa” oyun üslubuna görə “Qarabağ”a yaxın komandadır. Hücumameyilli futbol sərgiləyirlər, çox sürətlə irəli çıxırlar. Çox qol vurmağı bacaran, eyni zamanda, çox qol buraxan komandadır. Elə buna görə Çempionlar Liqasında növbəti mərhələyə vəsiqə qazana bilmədilər. Çempionlar Liqasından gələnlərin hər biri kifayət qədər güclüdür. Bu mərhələdə zəif komanda anlayışı yoxdur. “Qarabağ”a çox çətin olacaq. Amma Azərbaycan təmsilçisi öz dəst-xəttini tuta bilib. İstənilən rəqibə qarşı yüksək səviyyədə oyun sərgiləyə bilir”.

44 yaşlı sabiq qapıçı qış toplanışından çox şeyin asılı olacağını hesab edir: “Ümid edirəm ki, “Qarabağ” pley-off səddini də keçər. Ancaq bunlar növbəti ilin məsələsidir. İndidən nəsə demək çox çətindir. Qış hazırlıq dövrü var. Kimsə zədələnə, komandalardan biri matça optimal heyətlə çıxmaya bilər. Hazırkı durum odur ki, “Qarabağ” layiq olduğu şəkildə pley-offdadır. Rəqib də “dişinə görə"dir. Təmsilçimizdən keyfiyyətli oyun gözləyəcəyik”.

Qeyd edək ki, “Qarabağ” “Braqa” ilə ilk oyunu 2024-cü il fevralın 15-də səfərdə, cavab görüşünü isə 22-də evdə keçirəcək.