Azərbaycanın yeniyetmə və gənc kikboksçulardan ibarət millisi tarixi uğura imza atıb

Azərbaycanın kikboksinq üzrə yeniyetmə və gənclərdən ibarət millisi tarixi uğura imza atıb.

Azərbaycan Kikboksinq Federasiyasının (AKF) mətbuat xidmətindən "QELEBE.AZ"a verilən məlumata görə, İtaliyanın Yezolo şəhərində keçirilən WAKO uşaq, yeniyetmə və gənclərin dünya çempionatının son günündə yığmanın daha bir üzvü qızıl medal qazanıb.

Bu, "Ağ canavar" ləqəbli Amin Quliyevdir. 60 kq çəki dərəcəsində yer alan idmançı kikboksinqin "Low kick" versiyasında türkiyəli Mustafa Soner Kılınça qalib gələrək, ardıcıl ikinci dəfə gənclər arasında dünya çempionu olub. Həmçinin, bu gün Vüqar Məmmədov (60 kq) "Low kick", Akif Quluzadə (57 kq) K1 versiyalarının finalında uduzaraq gümüş medalla kifayətlənib.

Beləliklə, 38 idmançı ilə dünya çempionatına yollanmış Azərbaycan yığmasının 20 üzvü (7 qızıl, 6 gümüş və 7 bürünc medal) fəxri kürsüyə qalxaraq, tarixi nəticəyə imza atıb. İndiyədək AKF idmançıları həm medal sayı, həm də əyar baxımından belə nəticə göstərməyib.

Millinin heyətində Murad Gəncəliyev (K1, 45 kq), Rafiq Babazadə (K1, 48 kq), Sübhan Məmmədov (low kick, 45 kq), Ramal Zeynallı (low kick, 48 kq), Elvin Məmmədov (low kick, 54 kq), Amin Quliyev (low kick, 60 kq), Nizami Əliyev (kick light, 32 kq) qızıl, Rinat Qiyasov (low kick, 45 kq), Renat Qiyaslı (low kick, 51 kq), Vüqar Məmmədov (low kick, 60 kq), Akif Quluzadə (K1, 57 kq), Əli Cəfərli (full contact, 54 kq) Kənan Cəfərli (kick light, 57 kq) gümüş, Şükür Aslanlı (low kick, 42 kq), Mahmud Hüseynov (57 kq), Nicat Ələkbərli (low kick, 63,5 kq), Səfərəli Vəhədov (low kick, 71 kq), Gülməmməd Səfərli (low kick, +81 kq), Elton Hüseynov (low kick, +91 kq), Murad Məmmədov (full contact, 60 kq) isə bürünc medal qazanıblar.

Qeyd edək ki, ötən il Monteneqronun Budva şəhərində keçirilmiş yeniyetmə və gənclərin Avropa çempionatında Azərbaycan millisi 17 medal (5 qızıl, 5 gümüş və 7 bürünc) qazanmışdı.