Azərbaycan millisinin futbolçusu: "İsveçlə oyunda müsbət nəticə üçün əlimizdən gələni edəcəyik"

"Əlimizdən gələni edəcəyik ki, doğma meydanda müsbət nəticə qazanaraq azarkeşlərimizi sevindirək".

Bunu "QELEBE.AZ"a açıqlamasında Azərbaycan millisinin futbolçusu Elvin Camalov Bakıda İsveç yığmasına qarşı keçirəcəkləri AVRO-2024-ün seçmə mərhələsinin oyunu ilə bağlı danışarkən deyib.

28 yaşlı yarımmüdafiəçi qarşılaşmanın çətin keçəcəyini bildirib: "Rəqib Avropa çempionatına vəsiqə qazana bilməsə də, qitənin futbol ölkələrindən hesab olunur. Səfərdəki ilk matçımız bu komandanın gücündən xəbər verir".

Camalov yığmadakı abu-havadan söz açıb: "Seçmə mərhələdə şansımızın olub-olmamasından asılı olmayaraq, millinin qarşılaşmalarında əhval-ruhiyyə, görüşə köklənmə həmişə fərqli olur. Yığmanın formasında meydana çıxırsansa, matçın əhəmiyyəti ikinci plana keçir. Növbəti mərhələyə vəsiqə şansının olub-olmaması elə də əhəmiyyət daşımır. Meydana çıxıb son dəqiqəyə kimi müsbət nəticə üçün mübarizə aparmalısan".

Qeyd edək ki, noyabrın 16-da Tofiq Bəhramov adına Respublika stadionunda gerçəkləşəcək Azərbaycan - İsveç görüşü saat 21:00-da başlayacaq. F qrupunda yer alan millimiz 6 oyundan sonra 4 xalla 4-cü pillədə qərarlaşıb. Hesabında 7 xal olan İsveç isə üçüncüdür.