İsrailin cüdo millisinin baş məşqçisi: "Azərbaycanda hər şey çox gözəldir"

"Dünya çempionatından əvvəl yaxşı təlim-məşq toplanışı keçə biləcəyimiz yer axtarırdıq".

Bunu "Report"un Qərb bürosuna açıqlamasında İsrailin cüdo millisinin baş məşqçisi, Barselona-1992 Yay Olimpiya Oyunlarının, eləcə də dünya və Avropa çempionatlarının mükafatçısı Şay-Oren Smadca Göygöl Olimpiya Kompleksindəki beynəlxalq təlim-məşq toplanışı barədə danışarkən deyib.

52 yaşlı baş məşqçisi bildirib ki, Azərbaycan dünyanın ən güclü cüdo ölkələrindən biridir: "Bizim sıx əlaqələrimiz var. Burada məşq yeri, yemək, hotel və bütün şərait yaxşıdır. Hər şey çox gözəldir".

Özbəkistan millisinin baş məşqçisi, olimpiya, üçqat dünya və ikiqat Avropa çempionu, gürcü-yunan əsilli İlias İliadis isə bildirib ki, ilk dəfə Göygöldə olur: "Peşəkar idmançılar üçün belə bir Olimpiya bazasının, imkanların olmasını gördüm. Belə şərait çox ölkədə yoxdur. Azərbaycan Cüdo Federasiyasına, böyük məşqçi və məşqçilərə təşəkkür edirəm ki, dünya çempionatına hazırlaşmaq üçün belə güclü toplanış təşkil olunub".

35 yaşlı baş məşqçinin sözlərinə görə, 6 - 13 oktyabrda Özbəkistanın paytaxtı Daşkənddə keçiriləcək dünya çempionatı üçün medal proqnozu vermək çətindir: "Mən heç vaxt bu barədə danışmıram. İdmançılarım dünya çempionatına hazırdırlar. Bu, cüdodur. Hamının medal şansı var".