"ABU Arena" yaxın günlərdə yeni adla fəaliyyətə başlayacaq

Azərbaycanın həndbol üzrə milli komandaları və klubları üçün nəzərdə tutulan "ABU Arena" idman kompleksi yaxın günlərdə "AHF Arena" kimi fəaliyyətə başlayacaq.

Azərbaycan Həndbol Federasiyasının (AHF) mətbuat xidmətinin rəhbəri Pünhan Mürsəliyevin "QELEBE.AZ"a verdiyi məlumata görə, xeyli vaxtdır həyata keçirilən işlər artıq yekunlaşdırılıb.

Federasiya rəsmisi bildirib ki, qısa müddət ərzində xeyli iş görülüb: "Məşq zalında, soyunub-geyinmə və istirahət otaqlarında təmir işləri başa çatdırılıb. 2004-cü ildə tikilən idman qurğusunda hər cür şərait yaradılaraq, həndbolçuların ixtiyarına verilib".

Qeyd edək ki, "AHF Arena" da həm yerli yarışların, həm də beynəlxalq miqyaslı turnirlərin oyunları keçiriləcək.