Azərbaycan millisinin baş məşqçisi: “Mənə deyirdilər ki, məşqə gələn uşaqlardan pul yığ”

“Güləşlə məşğul olanda mənə deyirdilər ki, məşqə gələn uşaqlardan pul yığ və qurumun özü-özünü maliyyələşdirdiyini söylə”.

“QELEBE.AZ” xəbər verir ki, bunu Azərbaycan yığmasının sabiq futzalçısı Ağatahir Əzimov Azərbaycan Futzal Federasiyasının mətbuat xidmətinə müsahibəsində deyib.

“Korifeylərimiz” rubrikasının qonağı olan 49 yaşlı mütəxəssis vaxtilə 13 il güləşlə məşğul olduğunu bildirib: “Futzala 20 yaşımda gəlmişəm. Bir dəfə 44 saylı məktəbin həyətində məhəllə-məhəlləyə futbol oynayırdıq. Rəhmətlik Oqtay Heybətov məni və qardaşımı futbol məşqlərinə dəvət etdi, yoxladı, dedi ki, futbola keçin, sizə maaş veriləcək. Həmin vaxt güləş müəllimi işləyirdim. Təsəvvür edin, 54 tələbəm var idi, ayda 2 dollar maaş yazırdılar, heç onu da almırdım. Çünki o pulla dolanmaq mümkün deyildi. Uşaqlardan pul toplamağımı istəyirdilər, amma mən yığmırdım, havayı işləyirdim. Oqtay müəllimin təklifini də qardaşıma görə dəyərləndirdim. Onun təkidi ilə getdik futbola və o vaxtdan futzalçı oldum”.

Əzimov güləşlə məşğul olmasının xeyrini futzalda gördüyünü sözlərinə əlavə edib: “Fiziki baxımdan bütün oyunçulardan ikibaş üstün idim. Düzdür, futzalı başlanğıcda təcrübəlilərdən zəif oynayırdım. Amma gücüm çox idi. Təsəvvür edin, “stolb” oynayan zaman rəqibin iki futzalçısı məni yerimdən tərpədə bilmirdi. Zərbəm o qədər güclü idi ki, hər oyunda bir neçə qol vururdum”.

Qeyd edək ki, Ağatahir Əzimov hazırda 19 yaşadək futzalçılardan ibarət Azərbaycan millisinin baş məşqçisidir.