Azərbaycan millisinin futbolçusunun meneceri: “Namik Ələskərov üçün ən uyğun variant “Zirə” oldu”

Azərbaycan millisinin üzvü Namik Ələskərov üçün ən uyğun variant “Zirə” olub.

Bunu “QELEBE.AZ”a açıqlamasında ötən gün Bakı klubu ilə müqavilə imzalayan yarımmüdafiəçinin meneceri Vaqif Heydərli deyib.

O, Ələskərova Türkiyə klublarından da təkliflər olduğunu deyib:

“Namik Ələskərova yerli klublarla yanaşı, Türkiyənin aşağı liqasından da dəvət gəlmişdi. Danışdıq, müzakirə apardıq. Ən uyğun və optimal variant “Zirə” olduğuna görə bu komandanı seçdik. Təbii ki, seçim zamanı maliyyə məsələləri həmişə rol oynayır. Amma bu dəfə maliyyə ön planda deyildi. Daha çox digər nüanslar rol oynadı”.

V.Heydərli futbolçunun Türkiyə klublarının təkliflərini dəyərləndirməməsinə toxunub:

“Bilirsiniz ki, Türkiyənin aşağı liqa klublarının əksəriyyətində sabitlik çatışmır. Bir-iki ay sonra nə olacağı bəlli deyil. Ona görə də Namik sabitliyi və ciddi hədəfləri olan peşəkar komanda seçməyi düşündü. Çünki hazırda onun ən böyük çatışmazlığı sabitliklə bağlıdır. Düzdür, “Sabah”da potensialını tam göstərmək üçün zədələr də imkan vermədi. Daim oynamaq üçün "Zirə" ilə uzunmüddətli müqavilə bağladı. Hazırda zədəsi yoxdur və dünəndən yeni komandasının məşqlərinə qoşulub”.

Qeyd edək ki, N.Ələskərov “Zirə” ilə "2+1" illik müqavilə bağlayıb.