"Vest Hem" klubu İngiltərənin U-21 yığmasının yarımmüdafiəçisinin transferində maraqlıdır

"Vest Hem" klubu "Liverpul"un və İngiltərənin U-21 yığmasının yarımmüdafiəçisi Harvi Elliottun transferində maraqlıdır.

"Report" xəbər verir ki, bu barədə “The Guardian” məlumat yayıb.

Klub Məhəmməd Kudusun "Tottenhem"ə transferindən əldə etdiyi vəsaiti bu keçid üçün ayırmağa hazırdır. Ehtimallara görə, futbolçu 55 milyon funt-sterlinqə satılıb.

"Vest Hem"in baş məşqçisi Qrem Potter 22 yaşlı Elliotun komandaya qoşulmasını istəyir. Çünki mütəxəssis londonluların heyətini gəncləşdirməyə çalışır.

Qeyd edək ki, "Liverpul"un yarımmüdafiəçisi 21 yaşadək futbolçular arasında Avropa çempionatının ən yaxşı oyunçusu seçilib. Harvi Elliott ötən mövsüm İngiltərə Premyer Liqasında 18 matçda iştirak edib, bir qol vurub və iki məhsuldar ötürmə edib. "Transfermarkt" futbolçunun bazar dəyərini 30 milyon avro qiymətləndirib.