Azərbaycan millisinin futbolçusu ilə Türkiyə klubları maraqlanır

“Sabah”dan ayrılan Azərbaycan millisinin üzvü Namik Ələskərovla Türkiyənin I Liqa klubları maraqlanır.

Bunu “Report”a 30 yaşlı futbolçunun meneceri Vaqif Heydərli deyib.

O, təcrübəli futbolçu ilə Türkiyənin I Liqasından bir neçə komandanın maraqlandığını və hazırda şərtlərlə bağlı danışıqlar aparıldığını vurğulayıb. Menecer iki klubdan konkret təklif gəldiyini söyləyib.

V.Heydərli Namikin Azərbaycanda qalmasının və ya ölkə xaricinə getməsinin şərtlərdən asılı olacağını, həmçinin digər klublardan da cavab gözlədiklərini vurğulayıb.

Qeyd edək ki, N.Ələskərov 2022-ci ildən “Sabah”ın formasını geyinib. O, paytaxt təmsilçisinin heyətində 83 oyun (7 qol) keçirib, Premyer Liqanın gümüş medallarını qazanıb, Azərbaycan Kubokunun qalibi olub.