Millinin baş məşqçisi: "Ortaya qoyulan xarakter göstərdi ki, Azərbaycanda yaxşı futbolçular var"

On yeddi yaşadək futbolçulardan ibarət Azərbaycan milli komandasının baş məşqçisi Aqil Nəbiyev Qəbələ şəhər stadionunda Qazaxıstanın müvafiq yaş qrupundan ibarət komandasına qalib gəldikləri yoxlama görüşünü (2:0) dəyərləndirib.

"Report" xəbər verir ki, mütəxəssis bu barədə AFFA-nın Mətbuat xidmətinə açıqlama verib.

O, komandanın çıxışından məmnun olduğunu vurğulayıb:

“Çətin oyun oldu. Qəbələdə neçə gündür yağışın yağması da müəyyən təsir göstərdi. İspaniyanın “Marcet” komandasından dəvət edilən 9 futbolçumuz dünən gecə kollektivə qoşulublar. Komanda şəklində məşq edə bilməməyimiz bir qədər sıxıntı yaratdı.

Bu gün ortaya qoyulan xarakter göstərdi ki, Azərbaycanda yaxşı futbolçular var. İstər UEFA İnkişaf Turnirində, istərsə də son matçlarda bunu sübut etmişik. Sadəcə, düzgün istiqamət götürmək, bu uşaqlara güvənmək lazımdır. İnanıram ki, getdikcə daha yaxşı olacağıq. Bu kollektivlə martdan bir yerə yığılırıq. Bu, artıq üçüncü toplanışımızdır.

Rəsmi oyunlar öncəsi daha bir təlim-məşq toplanışımız olacaq. Avropa çempionatının seçmə mərhələsində Fransa, İsrail və Rumıniya ilə eyni qrupda çıxış edəcəyik. Rəqiblər güclü olsalar da, komandamıza inanırıq”.

Qeyd edək ki, Azərbaycanın U-17 millisi növbəti yoxlama oyununu iyunun 10-da Gürcüstan yığmasına qarşı keçirəcək.