Qurban Qurbanov: "Azərbaycan Kubokunun final matçı hamı üçün vacibdir" 

Azərbaycan Kubokunun final matçı hamı üçün vacibdir.

"QELEBE.AZ"un məlumatına görə, bunu "Qarabağ"ın baş məşqçisi Qurban Qurbanov mətbuat konfransında deyib.

Təcrübəli mütəxəssis "Sabah"a qarşı keçirəcəkləri Azərbaycan Kubokunun final oyunu ilə bağlı fikirlərini bölüşüb:

"Oyun neytral meydanda baş tutacaq. Yaxşı oyun sərgiləmək niyyətindəyik. Kubok əlavə prestijdir. Finalda da yaxşı nəticə əldə etmək istəyirik. "Sabah" yaxşı təşkilatlanmış komandadır. İddalıdırlar. Premyer Liqada beşinci yeri tutmağa layiq deyildilər. Daha yuxarı pillələrdə ola bilərdilər. Qarşımızda möhkəm komanda olacaq. Onlara qarşı oynamaq xoşdur. Hər iki komandaya uğurlar arzulayıram'.

Q.Qurbanov rəqiblərin onlara qarşı müdafiədə səliqəli oynadığını vurğulayıb: 

"Çempionatın qalibi olmuşuq. Oyunçular hər zaman liderə qarşı istəkli olurlar. Biz də futbolçu olduğumuz dönəmdə bunu yaşamışıq. Avrokubokda iddialı klubla qarşılaşanda motivasiyamız yüksək olur. Məncə, "Sabah"la aramızda elə də böyük fərq yoxdur". 

O, Sumqayıtda həmişə futbola böyük maraq olduğunu söyləyib:

"Futbolçular üçün də orada oynamaq xoş olacaq".

Mütəxəssis penaltilər seriyasına ciddi hazırlıq görmədiklərini deyib:

"Bəzi məşqlərdə buna şərait yaradırıq".

Qeyd edək ki, mayın 31-də Mehdi Hüseynzadə adına Sumqayıt şəhər stadionunda təşkil olunacaq matç saat 19:00-da start götürəcək.