11-ci dəfə Avropa çempionu olan Fərhad Rəcəbli: "Cüdoya olan sevgim və ölkəm üçün medallar qazanıram"

Latviyanın paytaxtı Riqada təşkil olunan veteranlar arasında Avropa çempionatında qızıl medal qazanan Azərbaycan cüdoçusu Fərhad Rəcəbli (90 kq) çıxışını dəyərləndirib.

"Report"un məlumatına görə, o, bu barədə Avropa Cüdo Birliyinin (EJU) rəsmi saytına açıqlama verib.

F.Rəcəbli 11-ci dəfə bu yarışda birinci yeri tutduğu üçün xoşbəxt olduğunu söyləyib:

"Hər şey gözlədiyim kimi keçdi. Rəqiblərimin üçü də güclü idi. Özümü turnirə yaxşı hazırlamışdım. Final qarşılaşması xüsusilə yaddaqalan oldu".

65 yaşlı veteran idmançı 12 yaşından fasiləsiz cüdo ilə məşğul olduğunu deyib:

"Mənə motivasiya verən şey sadədir. Cüdo uzun zamandır həyatımın bir parçası olub. Yaxınlarım məndən yeni medallar gözləyir. Bəzən bu nailiyyətlərə məndən daha çox sevinirlər. Bunları şöhrət üçün etmirəm. Cüdoya olan sevgim və ölkəm üçün medallar qazanıram. Azərbaycanı hər zaman qürurla təmsil edirəm. Bu idman növü asan deyil. Amma mənə hər şey verib. Bunun üçün cüdoya minnətdaram".

Qeyd edək ki, Fərhad Rəcəbli (90 kq) M-8 yaş kateqoriyasında mübarizə aparıb.