Redon Cica: "Qarabağ"da qalmağı düşünürəm"

"Qarabağ"ın hücumçusu Redon Cica cari mövsümün sonunda klubdan ayrılacağı ilə bağlı xəbərlərə münasibət bildirib.

"QELEBE.AZ"a açıqlama verən 26 yaşlı hücumçu Ağdam təmsilçisi ilə müqaviləsinin davam etdiyini xatırladıb.

"Mənim bu komanda ilə sözləşməm davam edir və buna uyğun davranmalıyıq. Demək lazımdırsa, "Qarabağ"da qalmaq mənim üçün xoşdur. Bu klubda qalmağı düşünürəm", - deyə o bildirib.

R.Cica ötən gün Misli Premyer Liqasının XXXV turunda qarşılaşdıqları "Kəpəz"lə (3:0) oyundan sonra baş tutan mükafatlandırma mərasimi ilə bağlı danışıb:

"Bütün mövsüm boyunca çalışırsan, vuruşursan və nəhayət, istədiyini əldə edəndə çox sevinirsən. Biz də çox sevincliyik. Çempion olmaq möhtəşəm hissdir. Əla bir mövsümü arxada qoyduq. Rəqiblərimiz bizə qarşı xüsusi motivasiya ilə hazırlaşırdılar. İnanıram ki, uğurlu çıxışımızın davamı Çempionlar Liqasında gələcək".

Qeyd edək ki, bir müddət Albaniya millisinin də formasını geyinən Redon Cica "Qarabağ"a 2023-cü ildə ölkəsinin "Tirana" klubundan keçib.