Bakıda bədii gimnastika üzrə Dünya Kuboku, "AGF Trophy" beynəlxalq turnirinin açılış mərasimi keçirilib

Bakıda bədii gimnastika üzrə Dünya Kuboku, "AGF Trophy" beynəlxalq turnirinin açılış mərasimi keçirilib.

“Report” xəbər verir ki, Milli Gimnastika Arenasında baş tutan tədbir iştirakçı ölkələrin bayraqlarının arenaya gətirilməsi ilə başlayıb.

Ardınca Azərbaycan Gimnastika Federasiyasının baş katibi Fatimə Şəfizadə açılış nitqi ilə qonaqları salamlayaraq iştirakçılara uğurlar arzulayıb:

"Artıq ölkəmiz doqquzuncu dəfədir bu yarışa ev sahibliyi edir. Bildirmək istəyirəm ki, ildən-ilə turnirdə iştirak edən ölkələrin sayı artmaqdadır. Hər il respublikamızda gimnastika növləri üzrə keçirilən mötəbər yarışlar və qazanılan nailiyyətlər Azərbaycanın Birinci vitse-prezidenti, Azərbaycan Gimnastika Federasiyasının prezidenti Mehriban Əliyevanın idmanın bu növünün inkişafına göstərdiyi diqqət və qayğının nəticəsidir”.

Sonra tədbir Azərbaycanın Dövlət Himninin səsləndirilməsinin ardıncan bədii hissə ilə davam edib.

Qeyd edək ki, bu gündən start götürən və üç gün davam edəcək yarışda gimnastlar ayrı-ayrı alətlər və çoxnövçülük üzrə öz bacarıqlarını sərgiləyirlər. Ənənəyə uyğun olaraq ən çox icra xalını toplamış gimnast və qrup komandasına “AGF Trophy” kuboku təqdim olunacaq.

FOTO: Samirə Həsənova