Azərbaycan klubunun 5 oyunluq cəzalandırılan prezidenti: "Hakimin təhqir edilməsindən söhbət gedə bilməz"

Hakimin təhqir edilməsindən söhbət gedə bilməz.

Bunu “QELEBE.AZ”a açıqlamasında Azərbaycan II Liqasında çıxış edən “Haypers Guba”nın prezidenti Ayaz Abdullayev XIX turda baş tutan “Ağdaş”la (3:3) matçda yaşananlara görə cəzalanmasına münasibət bildirərkən deyib.

Klub rəhbəri etirazlarının təhqir kimi qələmə verildiyini vurğulayıb:

“İntizam Komitəsinə necə deyilibsə, o formada qərar qəbul edilib. Lakin videotəkrara baxanda hakimlə nə qədər nəzakətli davrandığım görünür. Hansısa emosional davranış ola bilər. Hakimin təhqir edilməsindən söhbət gedə bilməz. Bu bir etirazdır, belə hallara dünya futbolunda da rast gəlinir. İndiyə qədər heç bir hakimlə yüksək tonda danışmamışam. Komandama da həmişə hakimlərə qarşı hansısa fikirlər səsləndirməmələrini tapşırıram”.

O, komandanın məşqçisi Rəsul Babazadənin 2 oyunluq cəzalanmasına da toxunub:

“Məşqçinin cəzasına gəlincə, oyun vaxtı nə baş verdiyini görməmişəm. Amma videotəkrara baxanda görünür ki, məşqçi əli ilə nəsə işarə edir. Bunun təhdid olub-olmadığını isə dəqiq deyə bilmərəm”.

Klub prezidenti öz cəzası ilə bağlı apellyasiya şikayəti verəcəklərini söyləyib:

“Tam gözləmədiyimiz epizodlar idi. Oyunda cəzalandırılan futbolçularla bağlı klub tərəfindən də tədbirlər görülüb. Açığı, məşqçi ilə bağlı apellyasiya şikayəti etməyəcəyik. Çünki əl hərəkəti olduğu görünür. Çox güman, özümlə və futbolçumuz Baxşəli Baxşəlyievlə bağlı apellyasiya şikayəti verəcəyik”.

Qeyd edək ki, “Ağdaş”la oyundan sonra hakimi təhqir etdiyinə görə A.Abdullayev 3-ü şərti olmaqla 5 oyunluq cəzalanıb. Bununla yanaşı, məşqçi Rəsul Babazadə meydana daxil olaraq hakimi təhdid etdiyi üçün 2 oyunluq disvalifikasiya olunub. Həmçinin oyun zamanı yol verdikləri intizamsızlığa görə futbolçulardan Baxşəli Baxşəliyev 2, Xaqan Məmmədov isə 1 oyunluq cəzaya məruz qalıb.