Azərbaycan Futzal Federasiyası Rövşən Hüseynlinin millidən kənarlaşdırılmasına münasibət bildirib

Azərbaycan Futzal Federasiyası (AFF) Rövşən Hüseynlinin Avropa çempionatının əsas mərhələsində səfərdə İsveç və Bakıda Xorvatiyaya qarşı oyunlardan öncə millinin heyətindən kənarlaşdırılmasına münasibət bildirib.

Bu barədə "QELEBE.AZ"a AFF-nin mətbuat xidmətindən məlumat verilib.

Futzalçı ilə bağlı qərarın hazırkı vəziyyətlə bağlı olduğu qeyd edilib:

"Bu, baş məşqçinin qərarıdır. Heyətlə bağlı seçim ona məxsusdur və baş məşqçinin qərarı müzakirə olunmur. İntizam komanda üçün çox vacibdir və hər kəs buna riayət etməlidir. Rövşən Hüseynli millidən ömürlük kənarlaşdırılmayıb. Bu qərar hazırkı vəziyyətlə bağlıdır. Gələcəkdə necə olacağı ilə bağlı baş məşqçi qərar verəcək. Millinin qapısı hər kəsin üzünə açıqdır”.

Qedy edək ki, R.Hüseynli intizamsızlıq səbəbindən baş məşqçi Vitali Borisovun qərarı ilə millinin heyətindən kənarlaşdırılıb. Yığma aprelin 11-də İsveçlə səfərdə, 15-də isə Bakıda Xorvatiya ilə üz-üzə gələcək.