“Qarabağ” akademiyasının koordinatoru: “Önəmli olan uşaqların beynəlxalq təcrübələrini artırmaqdır”

Önəmli olan uşaqların beynəlxalq təcrübələrini artırmaqdır.

Bunu “Report”a açıqlamasında “Qarabağ” akademiyasının koordinatoru Aftandil Hacıyev klubun U-14 komandasının Niderlandda keçiriləcək "SV EPE U-14 Youth Easter Cup" beynəlxalq turnirinə qatılacağı barədə danışarkən deyib.

Mütəxəssis əsas məqsədin komandaya təcrübə qazandırmaq olduğunu bildirib:

“Hazırda 14 yaşadək futbolçular arasında çempionat davam edir. Hazırlıqlar həftəlik tsikl şəklində aparılır. Qarşıda iki tur var. U-14 bu oyunlardan sonra beynəlxalq turnirə qoşulacaq. Bizdə olan məlumata görə, yarışda Niderlanddan “Feyenoord”, AZ, Danimarkadan “Norşellan” kimi komandalar olacaq. Ancaq yarışın tam reqlamentini göndərməyiblər. Önəmli olan uşaqların beynəlxalq təcrübələrini artırmaqdır. İstəyirik ki, güclü rəqiblərlə qarşılaşsınlar. Bunun faydasını gələcəkdə görəcəklər. Rəhbərlik də sağ olsun, təşkilati məsələlərdə yardımını əsirgəmir”.

Qeyd edək ki, yarış aprelin 18-dən 20-dək keçiriləcək.