Azərbaycan millisinin məşqçisi: "Aleksandr Medvedin xatirə turnirindəki nəticələri qənaətbəxş saymaq olar"

Aleksandr Medvedin xatirə turnirində qeydə alınan nəticələri qənaətbəxş saymaq olar.

Bunu “Report”a açıqlamasında Azərbaycanın 20 yaşadək güləşçilərdən ibarət millisinin məşqçisi Əşrəf Əliyev Belarusun paytaxtı Minskdə keçirilən 3 qat olimpiya çempionu Aleksandr Medvedin xatirə turnirində qazanılan nəticələrlə bağlı danışarkən deyib.

O, yarışa əsas heyətlə getmədiklərini vurğulayıb:

“Nəticələri qənaətbəxş saymaq olar. Çünki yarışa əsas heyətlə getməmişdik. Çox güclü yarış idi. Türkiyə millisi bir neçə çəkidə əsas heyət üzvlərini gətirmişdi. Qazaxıstan 40-a ayxın idmançı ilə təmsil olunurdu. Demək olar bütün əsas heyət üzvlərini gətirmişdilər. Yarış yaxşı keçdi. Əsas heyətlə yollansaydıq, çox yaxşı nəticələr qazanardıq. Əsas idmançıları bu turnirə apara bilməməyimizin səbəbi onların U-23 yığması ilə birlikdə Vladiqafqazda Avropa çempionatının hazırlıq prosesinə qatılmalarıdır”.

Mütəxəssis güləşçilərin çıxışına toxunub, yarışın çox gözəl keçdiyini qeyd edib:

“74 kq çəkidə Qadjimurad Omarov finala, Turan Bayramov isə yarımfinala yüksəldi. Bayramovu hakimlər uduzdurdular. Sonda heç xalını da vermədilər. Bilirsiniz ki, Turan çiynindən ağır zədə almış və əməliyyat olunmuşdu. 6 aydır zədəli idi. Bu səbəbdən bürünc medalın onun üçün çox gözəl nəticə olduğunu deyərdim. Şamil Zubairov isə 92 kq çəki dərəcəsində üçüncü yeri tutdu”.

Ə.Əliyev qarşıdakı planlara da toxunub:

“Martda U-23, apreldə isə böyüklər arasında Avropa çempionatı keçiriləcək. Güləşçilər bu yarışlara hazırlaşırlar”.

Qeyd edək ki, Azərbaycanın sərbəst güləşçiləri Aleksandr Medvedin xatirə turnirini 3 medalla başa vurublar. Qadjimurad Omarov (74 kq) gümüş, Turan Bayramov (74 kq) və Şamil Zubairov (92 kq) bürünc medal qazanıblar.